Кинескиот претседател Си Џинпинг се очекува за време на посетата на Вашингтон да побара од Доналд Трамп САД да ја запрат продажбата на оружје за Тајван, наведуваат извори запознаени со подготовките за средбата. Си најверојатно ќе се повика на заедничкото американско-кинеско соопштение од 1982 година, во кое Вашингтон изразил намера постепено да ја намалува продажбата на оружје за островот.
Пекинг го смета Тајван за своја територија и постојано бара прекин на американската воена поддршка, додека владата во Тајпеј ги отфрла кинеските претензии за суверенитет. САД немаат официјални дипломатски односи со Тајван, но американското законодавство предвидува обезбедување средства за негова самоодбрана.
Според Белата куќа, Трамп наскоро треба да одлучи за нов пакет продажба на оружје вреден околу 14 милијарди долари, кој со месеци е на чекање. Кина, според неименувани извори, бара Вашингтон да ги запре и испораките на оружјето што Тајван веќе го нарачал.
Прашањето дополнително ги оптоварува односите откако Кина во последните години значително ги засили воените активности околу островот, вклучувајќи и воени вежби.
Тајванското Министерство за надворешни работи соопшти дека внимателно ја следи средбата Трамп-Си и дека одржува блиска комуникација со Вашингтон.
