Исламскиот младински форум – Скопје (ИМФ) соопшти дека категорично ги отфрла, како што наведува, сите неосновани обвинувања и поврзувања на организацијата со одлуката на Кривичниот суд на Египет, по неодамнешните медиумски објави во кои нејзиното име беше споменато во тој контекст.
Во реакцијата, ИМФ наведува дека споменувањето во документи на странски институции не претставува правен доказ дека станува збор токму за нивната организација и дека за таква идентификација е потребна официјална документација и прецизна проверка на правниот идентитет.
Од организацијата посочуваат дека Исламскиот младински форум – Скопје е регистрирана граѓанска организација која повеќе од 25 години работи во согласност со законите на Македонија, со активности насочени кон едукација, младински развој, култура и поддршка на образованието.
Во соопштението се наведува и дека ИМФ реализирал проекти во партнерство со повеќе меѓународни организации и институции, меѓу кои Европската Унија, Европската комисија, ОБСЕ, како и со домашни институции на централно и локално ниво.
Организацијата најави дека ќе иницира судски постапки и ќе бара надомест на штета од сите субјекти за кои ќе се утврди законска одговорност за, како што наведува, ширење невистинити и штетни тврдења.
Воедно, од ИМФ апелираат до медиумите да ги проверуваат информациите пред нивното објавување и да избегнуваат непотврдени поврзувања кои, според нив, можат неправедно да му наштетат на угледот на организацијата.
На крајот од соопштението, Исламскиот младински форум нагласува дека останува посветен на заштитата на човековите права, слободата на здружување, образованието, еманципацијата на младите и унапредувањето на меѓукултурниот дијалог.
