Иран му испратил на Вашингтон седум услови за почеток на какви било преговори, соопшти Мохсен Резаи, секретар на иранскиот Врховен совет за национална безбедност. Целосната листа засега не е објавена, но Резаи откри три барања – прекин на војната на сите фронтови, ослободување на замрзнатиот ирански имот и укинување на американската поморска блокада.
Според Резаи, Катар како посредник веќе ги пренел иранските услови до Вашингтон, а Техеран сега го очекува одговорот на американскиот претседател Доналд Трамп.
„Ако Вашингтон сака да излезе од мочуриштето што самиот го создаде, нема друг избор освен да ги прифати правата и условите на Иран“, порача Резаи.
Тој предупреди дека Техеран е подготвен и за продолжување на конфликтот доколку дипломатските напори не дадат резултат.
„Во интерес на Вашингтон е да ги прифати овие услови, заканите на Трамп нема да постигнат никаков резултат, подготвени сме за одлучувачка војна“, изјави Резаи.
Иранскиот функционер тврди дека Техеран ја смета можноста за нов американски напад за реална и дека по претходните судири ги променил своите воени планови, со посебен фокус на американските поморски сили во регионот.
Катар и Пакистан во последните недели се обидуваат повторно да ги активираат преговорите меѓу Вашингтон и Техеран, а дипломатските канали меѓу двете страни не се целосно прекинати.
Според Резаи, Иран паралелно ги продолжува дипломатските контакти и подготовките за евентуална нова рунда од конфликтот.
