Јавното претпријатие „Колекторски систем – Скопје“, основано во декември 2018 година со одлука на Владата, има примарна дејност собирање, одведување и прочистување на отпадни води преку канализациски и колекторски системи, како и нивно контролирано испуштање со цел заштита на Охридското Езеро. Сепак, ревизорскиот извештај на Државниот завод за ревизија за 2024 година покажува дека системот речиси 35 години функционира без соодветна дозвола за дејноста за која е основан.
Ревизорите утврдиле низа неправилности, поради што дале неповолно мислење за реалноста на финансиските извештаи и за усогласеноста на работењето со законската регулатива. Имено, покрај проблемот со дозволата, претпријатието се соочува и со сериозни финансиски потешкотии. Според извештајот, има долгови поголеми од 8 милиони евра, а сметката му е блокирана со години.
Државниот завод за ревизија констатирал и дека инфраструктурата на системот – цевковод долг 40,9 километри, пумпни станици и пречистителна станица изградени пред повеќе од три децении – се уште не е запишана во Катастарот на инфраструктурни објекти. Претпријатието нема имотни листови ниту за објектите ниту за земјиштето под нив.
Во извештајот се нотираат и спорни исплати за паушални адвокатски услуги без соодветна документација. Станува збор за договор склучен во 2020 година на период од десет години, кој според ревизорите содржи неповолни услови за претпријатието.
