Градскиот воз официјално започна да сообраќа денеска на првата од трите планирани линии, со што граѓаните добија нова можност за побрз и поефикасен јавен превоз до главниот град.
Првата линија ги поврзува Зелениково – Ново Зелениково – Орешани – Јане Сандански – Драчево – Лисиче – Нова железничка станица Скопје, а сообраќајот ќе се одвива со три возови според утврден возен ред, кој го подготви МЖ Транспорт.
За реализација на проектот, Железници Инфраструктура изврши целосна реконструкција на железничката пруга на оваа релација, со што беа подобрени условите за сообраќај и овозможено повисоко ниво на безбедност и поголем капацитет за брзина.
Проектот „Градски воз“ е дел од владината стратегија за подобрување на јавниот превоз во Скопје. Целта е жителите од приградските населени места полесно и побрзо да стигнуваат до централното градско подрачје, со пократко време на патување, пониски трошоци и помалку чекање.
Особено значајно е што новата железничка линија ќе биде интегрирана со возниот ред на ЈСП Скопје, со што се создава единствен и подобро организиран систем на јавен превоз за граѓаните, учениците и студентите.
Во меѓувреме, Министерството за транспорт работи и на подготовка на преостанатите две линии од проектот „Градски воз“. Едната треба да ја поврзе Новата железничка станица со Бутел, Скопје-Север и Ѓорче Петров, додека другата е планирана на релација Нова железничка станица – Автокоманда – Маџари – Илинден.
Официјалната промоција на проектот е закажана за утре. На настанот се очекува да присуствуваат премиерот Христијан Мицкоски, вицепремиерот и министер за транспорт Александар Николоски, директорите на МЖ Инфраструктура и МЖ Транспорт, како и градоначалникот на Скопје Орце Ѓорѓиевски и градоначалниците на Зелениково, Кисела Вода и Аеродром.
Според најавите, делегацијата симболично ќе патува со воз од железничката станица во Зелениково до Новата железничка станица во Скопје, означувајќи го почетокот на проектот кој треба да стане нов столб на јавниот превоз во главниот град.
