Градоначалникот на Скопје, Орце Ѓорѓиевски, на денешната прес-конференција јавно испи вода од чешма за да покаже дека водата од скопскиот водовод е безбедна за пиење и дека нема никаква бактериолошка неисправност.
Неговиот потег следуваше по информациите што од утрово се проширија на социјалните мрежи, со кои се тврдеше дека во водата за пиење е пронајдена бактеријата ешерихија коли, што предизвика вознемиреност кај граѓаните.
Ѓорѓиевски категорично ги отфрли ваквите тврдења, оценувајќи дека станува збор за организирано ширење паника и дезинформации. Тој рече дека ваквото однесување не е политичка борба, туку сериозен напад врз безбедноста и спокојството на граѓаните.
„Ова е организиран напад за ширење хистерија кај граѓаните на Скопје. Според мене, ваквото однесување е рамно на терористички чин. Од утрово се координирано активирани бројни профили на социјалните мрежи, а сите информации ќе бидат доставени до Министерството за внатрешни работи за понатамошно постапување“, изјави градоначалникот.
Тој откри дека уште претходниот ден добил информации дека ќе се пласираат лажни вести за наводна бактериолошка неисправност на водата.
„Политичките напади можат да се разберат, но кога се создава паника околу нешто што директно ги засега здравјето и безбедноста на граѓаните, тоа е недозволиво. Добив стотици пораки од загрижени граѓани и ова нема да остане без реакција“, нагласи Ѓорѓиевски.
Одговарајќи на новинарско прашање дали е утврден изворот на дезинформациите, тој посочи дека е идентификувано лице кое, според неговите информации, ја споделило лажната порака во десетици групи на социјалните мрежи. Не откри детали за идентитетот, но наведе дека станува збор за лице кое е симпатизер или активист на една опозициска партија.
Ѓорѓиевски додаде дека надлежните институции и ЈП „Водовод и канализација“ континуирано го следат квалитетот на водата и дека нема никаква причина за загриженост, бидејќи водата што ја користат скопјани е исправна и безбедна за пиење.
