Градот Скопје ова лето ќе организира наставно-научен едукативен камп за учениците од средните училишта, кој ќе се одржи во Охрид од 19 до 31 август. Целта на кампот е да им овозможи на младите да стекнат нови знаења, да развиваат креативно размислување и да создадат нови пријателства преку различни образовни и спортски активности.
Информацијата ја сподели градоначалникот на Скопје, Орце Ѓорѓиевски, кој истакна дека вложувањето во младите претставува една од најважните инвестиции за иднината на градот и државата.
„Ова лето, Охрид ќе биде место каде нашите средношколци ќе учат поинаку, ќе размислуваат послободно и ќе создаваат нови пријателства и искуства кои долго ќе ги паметат. Знаењето е најголемата инвестиција во иднината, а наша обврска е да им овозможиме на младите што повеќе можности за развој и напредок“, порача Ѓорѓиевски.
Во рамки на кампот ќе бидат организирани научно-истражувачки работилници, едукативни предавања, интерактивни дискусии, тимски проекти, културно-историски посети, како и спортски активности. Програмата е осмислена да ја поттикне љубопитноста, креативноста, критичкото размислување и лидерските вештини кај учениците.
Според градоначалникот, најголемата вредност на кампот е можноста младите да сфатат дека знаењето не претставува само училишна обврска, туку алатка која отвора нови хоризонти, гради карактер и создава подобра иднина.
Од Град Скопје нагласуваат дека преку ваквите проекти продолжуваат да инвестираат во образованието и развојот на младите генерации, создавајќи услови за нивен личен и професионален напредок.
