Градоначалникот на Општина Центар, Горан Герасимовски, порача дека нацрт деталниот урбанистички план „Барутана“ нема да биде ставен на дневен ред на Советот сè додека не се обезбеди законско и прифатливо решение за сите отворени прашања поврзани со планот.
На брифинг со новинарите, Герасимовски објасни дека донесувањето нов план за ова подрачје е законска обврска на Општината, особено по укинувањето на претходниот план во 2025 година.
„По укинувањето на планот во 2025 година, наша должност е да почнеме процедура за донесување нов. Тој процес го започнавме“, изјави Герасимовски.
Тој нагласи дека за подрачјето на Водно мора да се постапува внимателно и дека покрај исполнувањето на формалните процедури, најважни се безбедноста, законитоста и интересот на граѓаните.
„Сè додека не најдеме законско и прифатливо решение за сите отворени прашања, јас, како градоначалник, нема да предложам овој нацрт ДУП да биде ставен на дневен ред на Советот. За Водно мора да бидеме особено внимателни“, рече тој.
Според Герасимовски, за нацрт-планот се добиени позитивни мислења од повеќе институции, меѓу кои Град Скопје, ЈП „Водовод и канализација“, Агенцијата за катастар на недвижности, Агенцијата за електронски комуникации, ЕСМ – Дистрибуција на топлина, Министерството за внатрешни работи и институциите од областа на животната средина.
Позитивно мислење, како што информираше градоначалникот, дала и Дирекцијата за заштита и спасување, но тој потенцираше дека тоа не значи автоматско усвојување на планот.
„Мислењата на институциите се важни, но за мене е подеднакво важно да ги отстраниме сите сомнежи околу стабилноста на теренот. Ќе ѝ наложиме на планерската куќа да нарача посебна студија од Градежниот факултет за процена на ризикот од ерозија, свлекување и нестабилност на падините“, додаде Герасимовски.
Тој посочи дека со новиот нацрт-план се предвидува намалување на вкупната површина за градба од 43.429 на 29.439 квадратни метри, односно за 33,3 проценти, како и зголемување на зеленилото во градежните парцели од 20 на 40 проценти.
Според него, со планот не се воведуваат нови градежни парцели, туку се задржуваат оние од претходната планска документација, со намалени градежни капацитети.
Во однос на сообраќајното решение, Герасимовски најави нова јавна анкета, на која жителите повторно ќе можат да дадат забелешки и предлози, особено за предвидените улици и условите на теренот.
Тој додаде дека Општина Центар нема да го расчистува теренот со свои средства, ниту ќе ја преземе обврската за финансирање на улиците предвидени со планот.
„Ова е прва фаза. На крајот Град Скопје и Министерството за транспорт повторно ќе треба да дадат позитивно мислење. Потоа планот ќе оди на усвојување во Советот на Општина Центар“, рече Герасимовски.
Нацрт-планот за Барутана беше изгласан на седница на Советот на Општина Центар на 14 јули 2026 година, а против него гласаа советници од повеќе политички групи.
