Во рамките на фестивалот „Есенски музички свечености“, вечерва од 20 часот, во Салон 19:19 при Културно-информативниот центар – Скопје, ќе се одржи соло гитарски концерт со авторска музика на Георги Шарески, еден од најистакнатите македонски гитаристи, композитори и аранжери.
Како што информира Дирекцијата за култура и уметност – Скопје, која е организатор на фестивалот, Шарески е познат по својот препознатлив музички израз, во кој мајсторски ги спојува балканските ритми со џез, фјужн и современа класика.
„Неговата музика се одликува со длабока емоционалност, комплексна хармонија и суптилна виртуозност“, соопштија организаторите.
Со девет авторски албуми зад себе, Шарески настапува како соло артист и во соработка со бројни врвни музичари од Македонија и странство. Неговите проекти го надминуваат жанровското ограничување, создавајќи спој на традицијата и современиот музички израз.
Редовно настапува на реномирани фестивали и сцени низ Европа и светот, со што значајно придонесува за меѓународната афирмација на македонската современа музика.
