Месецот на франкофонијата годинава ќе започне со танцовата претстава „F_AI_LLE“ на француската трупа K.Danse. Настанот е во организација на Францускиот институт во Скопје и Танц-Фест, а изведбата ќе се одржи на 10 март 2026 година во 20 часот во Македонскиот народен театар.
„F_AI_LLE“ е повеќе од танцова претстава – станува збор за интерактивна инсталација што го истражува односот меѓу човечкото тело и вештачката интелигенција. Делото се движи на границата меѓу современиот танц и дигиталните технологии, преиспитувајќи ја нашата врска со нормите, креативноста и технолошките системи.
Публиката не е само набљудувач, туку активен учесник – секој станува ко-креатор на уникатно уметничко искуство кое се менува во зависност од движењето и интеракцијата со дигиталниот простор.
Во рамки на гостувањето, од 9 до 13 март ќе се одржат работилници во Скопје, Битола, Куманово и Тетово, под водство на кореографот Жан-Марк Матос. Работилниците се наменети за танчери, млади изведувачи и наставници по француски јазик.
Проектот е поддржан во рамките на програмата FEF „Дигитални уметности“ и има цел да ја афирмира современата франкофонска продукција, како и да ги продлабочи културните врски меѓу Франција и Северна Македонија.
