Скопје денеска ќе биде дел од Европската ноќ на истражувачите – европска иницијатива чија цел е науката и истражувачката работа да им се доближат на граѓаните преку интерактивни содржини и директни средби со научници.
Настанот се организира во рамки на проектот „CHOOSE SCIENCE – Избери наука!“, координиран од Универзитетот „Св. Кирил и Методиј“ во Скопје, а активности ќе се одржуваат и во Битола, Штип и Охрид.
Во Скопје, посетителите ќе имаат можност да учествуваат на интерактивни работилници, научни демонстрации, изложби, панел-дискусии, презентации и посети на лаборатории на повеќе факултети при УКИМ.
Своите врати ќе ги отворат Машинскиот факултет, Факултетот за електротехника и информациски технологии (ФЕИТ), Факултетот за информатички науки и компјутерско инженерство (ФИНКИ), Природно-математичкиот факултет (ПМФ) и Економскиот факултет, кои ќе понудат различни активности од областа на инженерството, информатиката, вештачката интелигенција, природните науки и бизнис аналитиката.
Организаторите истакнуваат дека целта на манифестацијата е да се поттикне интересот за науката, истражувањето и иновациите, особено кај младите, преку непосреден контакт со научниците и нивната работа.
Сите активности се бесплатни и отворени за јавноста, а деталната програма со термините и локациите е достапна на веб-страницата на проектот.
