Еколошките активисти од иницијативата „Стоп за Усје“ и граѓани синоќа протестираа од Собранието до Министерството за животна средина, барајќи обновувањето на А-интегрираната дозвола за Цементарницата „Усје“ да биде според европските еколошки стандарди.
Активистите предупредуваат дека компанијата бара зголемена употреба на алтернативни горива и побараа појаснување како ќе се применуваат најавените построги правила од 2027 година.
Од Министерството претходно најавија дека дозволата ќе се обновува според новиот закон за контрола на индустриските емисии, кој треба да стапи во сила следната година.
Од „Титан-Усје“ пак, соопштија дека ги почитуваат сите законски обврски и дека во последните 15 години инвестирале 29 милиони евра во модернизација и заштита на животната средина.
