Екипажот на мисијата „Артемис 2“ безбедно се врати од првиот лет на човештвото до Месечината по повеќе од половина век. Четворицата астронаути слетаа во Пацификот според планот, соопшти американската вселенска агенција. Капсулата „Орион“ при слетувањето беше успорена со неколку црвено-бели падобрани.
Семејствата на астронаутите се собраа во просторот за посетители во контролниот центар, каде што се слушна силен и френетичен аплауз кога капсулата слета во водата. „Совршено прецизно слетување во водата“, изјави со радост портпаролот на НАСА, Роб Навијас.
Екипажот минатата недела полета од космодромот Кејп Канаверал во американската сојузна држава Флорида и потоа ја обиколи Месечината. Американските астронаути Кристина Кох, Виктор Гловер, Рид Вајсмен и Канаѓанецот Џереми Хансен се оддалечија од Земјата повеќе од кој било човек досега.
Со тоа мисијата заврши според планот. Екипажот слета во водите на Тихиот Океан јужно од Калифорнија, како што беше предвидено. Таму четворицата членови на екипажот беа пречекани од спасувачки тимови, соопшти НАСА. Тие требаше да бидат однесени до специјален брод, а подоцна назад во Хјустон.
Инаку, враќањето на Земјата се одвиваше под екстремни услови: при повторниот влез во атмосферата, со брзина поголема од 38.000 километри на час, вселенското летало „Орион“ беше изложено на температури над 2.700 степени Целзиусови.
Мисијата „Артемис 2“ се сметаше за генерална проба за планираното слетување на Месечината во 2028 година. Долгорочната цел е изградба на постојана станица на Месечината.
