ДЗС објави фотографија од запалениот автобус на Водно и објасни што се случило

Автобус на ЈСП „Скопје“, кој сообраќал на линијата број 25 кон Водно, денеска бил зафатен од пожар кај видиковецот на Средно Водно. Дирекцијата за заштита и спасување на својата Фејсбук страница објави фотографија од опожарениот автобус и објасни дека во гаснењето интервенирале две противпожарни возила и седум пожарникари од Скопската бригада за противпожарна заштита.

Благодарение на брзата реакција на возачот, автобусот бил паркиран на соодветно место, со што било спречено огнот да се прошири кон парк-шумата „Водно“. Во инцидентот нема повредени лица, а пожарот не ја зафатил околната шума. Од ЈСП „Скопје“ информираат дека се вршат проверки по кои треба да биде утврдена точната причина за избувнувањето на пожарот.