СДСМ упати остри критики кон ЗНАМ по повод одбележувањето на две години од формирањето на партијата, обвинувајќи ја дека ги изневерила очекувањата на своите гласачи и станала политички партнер на ВМРО-ДПМНЕ.
Во партиското соопштение се наведува дека ЗНАМ прво ја напуштил СДСМ, а потоа, според нив, ги изневерил и граѓаните кои очекувале политички промени. Од СДСМ тврдат дека ЗНАМ денес е составен дел од владејачкото мнозинство и го нарекуваат „сателит на Мицкоски“.
Опозициската партија обвинува дека наместо најавените реформи, ЗНАМ се поврзува со доделување тендери и кадровски решенија во институциите, изнесувајќи низа политички квалификации на сметка на раководството на партијата.
Во соопштението се споменуваат и наводи за фирма во Бугарија, бугарски пасоши, како и продажба на земјиште поврзано со инвестицијата на „Лидл“, при што од СДСМ поставуваат прашања за, како што велат, политичките и економските интереси на раководството на ЗНАМ.
СДСМ, исто така, ги повикува лидерите на ЗНАМ јавно да одговорат на обвинувањата што ги изнесува партијата, а најавените партиски активности ги оценува како обид за промоција на, според нив, неуспешна политика.
Во завршницата од соопштението, СДСМ порачува дека конечната оценка за работата на актуелната власт и нејзините коалициски партнери ќе ја дадат граѓаните на следните избори.
