Две лица загинаа, а четири се водат како исчезнати по силниот удар на тајфунот Дужуан врз пацифичката страна на Јапонија. Обилните дождови предизвикале свлечишта и поплави, а речиси 50.000 домаќинства останале без електрична енергија.
Во градот Јокосука, во регионот Канто, жена во шеесеттите години загинала откако свлечиште продрело во нејзината куќа.
Свлечишта се регистрирани и во префектурите Канагава и Чиба, каде спасувачките служби интервенираат на повеќе локации.
Во Миура, јужно од Токио, спасувачите ги пребаруваат урнатините на куќа погодена од свлечиште во потрага по исчезнато лице.
Енергетската компанија ТЕПКО потврди дека речиси 50.000 домаќинства во погодениот регион останале без струја.
Тајфунот во меѓувреме се движи кон североисток и се оддалечува од Јапонија, додека во погодените населени места започна расчистувањето на калта и последиците од невремето.
