Пејачката Тамара Тодевска повторно е во центарот на македонската музичка сцена со новиот сингл „Драма квин“, кој воедно претставува и прва песна од нејзиниот нов студиски албум „Кукла жива“. Она што го издвојува овој проект е фактот дека станува збор за прв визуелен албум создаден во Македонија.
Песната е авторско дело на Коста Петров и Тамара Тодевска, додека аранжманот го потпишува Емин Џијан во соработка со ансамбл од над 50 музичари и хор, што ја нагласува големината и амбицијата на проектот.
Спотот е снимен во студиото „Такат“, а режијата е на Мартин Трајановски, со кого Тамара соработува на повеќе проекти низ годините.
Албумот „Кукла жива“ содржи 10 нови песни, кои се целосно снимени со живи инструменти.
Во врска со новиот сингл и целиот проект, Тамара истакнува дека албумот претставува збир на музика инспирирана од различни периоди од нејзиниот живот. Таа посочува дека „Драма квин“ е динамична и енергична песна, а процесот на снимање на видеото бил особено инспиративен, бидејќи во него учествувале долгогодишни соработници и пријатели, што придонело за природна креативна атмосфера.
Песната „Драма квин“ е веќе достапна на официјалниот YouTube канал на Тамара Тодевска, а наскоро ќе биде објавена и на сите дигитални музички платформи.
Паралелно со промоцијата, Тамара и нејзиниот тим активно се подготвуваат за голем солистички концерт и промоција на албумот „Кукла жива“, кој ќе се одржи на 3 октомври (сабота) во арената „Борис Трајковски“.
