Епидемијата на ебола во Уганда е завршена, потврди Светската здравствена организација, но во соседната Демократска Република Конго ситуацијата сè уште не е ставена под контрола. Владата на Уганда на 28 јули прогласи дека земјата е ослободена од болеста, откако беа регистрирани 20 случаи и два смртни случаи. СЗО продолжи да ја следи состојбата до оваа недела за да се потврди дека синџирот на пренесување на вирусот е целосно прекинат.
Во Демократска Република Конго, пак, бројот на заразени продолжува да расте и покрај напорите на здравствените власти за ограничување на епидемијата. Директорката на СЗО за вонредни состојби во Африка, Мари Розелин Белизер, изјави дека е постигнат одреден напредок, но состојбата сè уште не е под контрола. Според податоците на конгоанската влада, досега се регистрирани повеќе од 5.600 случаи на ебола. Од последиците на болеста починале повеќе од 2.700 лица.
Според СЗО, епидемијата во Демократска Република Конго е втората најсмртоносна епидемија на ебола регистрирана во историјата.
