Најмалку четири лица загинаа, а 20 се повредени во израелски напади врз подрачјето на Набатије во јужен Либан, објави либанската државна агенција ННА. Во нападите била погодена и уништена болницата „Гандур“ во Набатије ал-Фаука, објект кој со години не бил во функција.
Силен воздушен напад погодил и историска зграда во градот Набатије, која некогаш била користена како ресторан и е целосно уништена. Значителна материјална штета е предизвикана и врз околните државни институции, продавници и кафулиња, а оштетени се канцеларии и уништена документација.
Израелската војска претходно соопшти дека Хезболах со два дрона нападнал израелски војници во јужен Либан, при што еден од дроновите бил соборен и немало повредени војници. ИДФ го оцени нападот со дронови како сериозно прекршување на договорот за прекин на огнот меѓу Израел и Либан и соопшти дека поради тоа напаѓа цели во јужниот дел на земјата.
Израелскиот портал „Јнет“, повикувајќи се на безбедносни извори, објави дека болницата повеќе не работела и дека Хезболах наводно ја користел како база. Тврдењето дека објектот бил користен од Хезболах засега не е независно потврдено.
