СДСМ обвини дека загадувањето стигнало и до Скопје, откако во реката Вардар била забележана бела пена која се слева од Лепенец.
Од партијата велат дека, по проблемите со загадена вода во повеќе градови, појавата на белата пена е уште еден показател за, како што наведуваат, системски колапс на институциите. Според нив, пената, која наликува на синтетичка материја, е видлив доказ за загадување.
Во меѓувреме, на терен се екипи на инспекциските служби на Град Скопје и Министерството за животна средина. Градоначалникот Орце Ѓорѓиевски информира дека потрагата по можниот причинител се врши и со дрон, додека екипи на ЈП „Водовод и канализација“ земаат примероци од водата за лабораториска анализа.
„Во комуникација сме со Министерството за животна средина и верувам дека за кратко време ќе биде откриен причинителот на оваа појава и соодветно санкциониран. Толеранција нема да има за никого“, објави Ѓорѓиевски на социјалните мрежи.
Надлежните најавуваат дека јавноста ќе биде информирана веднаш штом ќе бидат познати резултатите од анализите и ќе се утврди за каква материја станува збор.
