Поранешната градоначалничка на Скопје, Данела Арсовска, тврди дека поранешниот градоначалник на Општина Чаир, Висар Ганиу, поднел тужба против неа за клевета, откако таа јавно го нарекла „криминалец“.
Арсовска во објава на социјалните мрежи наведува дека Ганиу побарал надомест поради, како што тврди, претрпена душевна болка, но таа ги отфрла ваквите наводи и повторува дека нејзините обвинувања се поткрепени со документација.
„Само прво треба да одговори за 150 фалсификат легализации, меѓу кои зграда вредна 5 милиони евра, наводно изградена во 2010 година од 15-годишник, со фирма основана во 2020, на плац купен во 2021 година“, напиша Арсовска.
Таа прашува како објект кој, според неа, бил документиран дека се гради во 2025 година, можел да биде легализиран како да бил изграден во 2010 година.
Арсовска во објавата наведува и дека Ганиу не чувствувал душевна болка поради нејзините квалификации, туку затоа што, како што тврди, бил соочен со голем број докази.
„Имаш болка бидејќи си фатен со 3200 страни докази“, напиша Арсовска, повторувајќи ги своите претходни обвинувања.
Таа дополнително обвини дека била изложена на закани и притисоци, вклучително и обиди за заплашување, но не изнесе дополнителни детали за овие тврдења.
Од страна на Ганиу засега нема официјална реакција за наводите на Арсовска. Случајот, доколку тужбата е поднесена, ќе продолжи низ соодветната судска постапка.
