Американското Министерство за финансии воведе санкции против големите руски нафтени компании „Роснефт“ и „Лукоил“ и ја повика Москва веднаш да се согласи на прекин на огнот, соопшти Белата куќа.
Санкции за двете најголеми руски нафтени компании се воведени, со цел, како што велат, да се „обесцени“ воениот фонд на Путин и да се поддржат напорите на Доналд Трамп за завршување на војната во Украина.
„Сега е време да се прекине убивањето и веднаш да се воспостави прекин на огнот“, изјави американскиот министер за финансии Скот Бесент. „Имајќи го предвид одбивањето на Путин да го запре овој бесмислен воен конфликт, Министерството за финансии ги санкционира двете најголеми руски нафтени компании кои го финансираат воениот апарат на Кремљ.“
Тој додаде дека САД се подготвени да преземат дополнителни мерки за да ја завршат војната во Украина. „Ги повикуваме нашите сојузници да ни се придружат и да се придржуваат до овие санкции,“ изјави Бесент.
За новите санкции се огласи и самиот Трамп:
„Денес е многу важен ден за она што го правиме. Погледнете, овие се огромни санкции. Навистина големи. Насочени се против нивните две најголеми нафтени компании. Се надеваме дека нема долго да останат на сила, се надеваме дека војната ќе заврши,“ рече тој од Белата куќа.
Министерот за финансии Бесент претходно им изјави на новинарите во Вашингтон дека најдоцна до четврток ќе бидат објавени дополнителни американски санкции насочени против Русија, оценувајќи дека станува збор за „значително зајакнување на притисокот врз Москва“.
Истовремено, земјите на Европската унија го одобрија 19-тиот пакет санкции против Русија поради војната во Украина, кој вклучува и забрана за увоз на руски течен природен гас, соопшти денеска данското ротирачко претседателство со ЕУ.
МОЖЕБИ ЌЕ ВЕ ИНТЕРЕСИРА: