Соработката помеѓу Македонија и Бугарија треба да оди во нагорно ниво. Самото соседство ни го наметнува тоа, а да не зборуваме дека така се оди и кон подобра иднина на двата народа.
Но, Софија наметна прашања кои се излишни и навредливи за Македонија и потребната соработка е мала. Затоа е добро што постои активната комуникација со бугарските власти околу соработката на Коридорот 8. Тоа како што истакна и министерот за надворешни работи Тимчо Муцунски, треба да биде патот на идната соработка меѓу двете земји.
Коридорот 8 е најдобриот пример дека кога постои волја, Македонија и Бугарија можат да соработуваат без политички тензии и со јасна европска перспектива. А двете земји имаат толку многу други проекти во сферата на економијата, образованието, науката, културата и спортот каде треба да се засилат активностите.
Преку зголемена соработка во овие полиња може да се гради доверба која е разнишана со политички теми кои упорно се наметнуваат. Патот до надминување на отворените прашања не мора да почне со уценувачки декларации и вета – туку со заеднички инвестиции. Ќе размислуваат ли вака политичките елити во Бугарија?
