Комитетот за надворешни работи (АФЕТ) на Европскиот парламент денеска го усвои Извештајот за напредокот на Северна Македонија за 2023 и 2024 година, подготвен од австрискиот европратеник и известувач за земјава, Томас Вајц.
Извештајот беше изгласан со широко политичко мнозинство, а Вајц во својата изјава изрази задоволство од постигнатиот консензус. „Горд сум на целата напорна работа што беше вложена во наоѓањето компромиси за да можеме да донесеме добро избалансиран извештај. Северна Македонија припаѓа во ЕУ. По 20 години преговори, мора да го задржиме моментумот и да го унапредиме процесот на проширување“, порача Вајц преку соопштение од прес-службата на Европскиот парламент.
Претходно, гласањето за Извештајот беше одложено од 4 јуни на барање на Вајц, поради, како што посочи, силни притисоци од бугарските европратеници кои се противеа на јасното именување на македонскиот јазик и идентитет во текстот. Вајц истакна дека бил сведок на интензивни политички дебати, но дека останува цврсто зад документот, кој е резултат на компромиси во кои биле вклучени сите пратенички групи.
Во Извештајот се нагласува посветеноста на Северна Македонија на евроинтегративниот процес и се повикува на брза имплементација на уставните измени како клучен чекор во преговорите за членство. Во документот, меѓу другото, се содржат и неколку јасни референци за признавање на македонскиот јазик и идентитет.
Извештајот сега треба да биде усвоен и на пленарно заседание на Европскиот парламент, кое ќе се одржи од 7 до 10 јули во Стразбур. Во меѓувреме, бугарски европратеник најави дека ќе поднесе „мислење на малцинството“ како додаток на документот.
