Цените на пазарите упорно растат. На пример, компирот е поскап за дури 70 отсто од лани. Слично е и со другите неопходни земјоделски производи.
Зошто е така? Оправдано ли е цените волку да растат?
Според официјалната статистика трошоците што ги имале земјоделците во просек се пораснати за само 2 отсто. Па тогаш кој ги дува цените и врз основа на каква пресметка?
Разни експерти во последниов период главно проблемот го лоцираа во преголемите маржи на прекупците и трговците, кои во континуитет вештачки ја зголемуваат цената на храната.
За ова вчера реагираше и премиерот Христијан Мицкоски, кој истакна дека Владата презела мерки за ограничување на трговските маржи.
„Преку Државниот пазарен инспекторат и Комисијата за заштита на конкуренцијата секојдневно вршиме инспекциски надзор и го следиме однесувањето на трговците. Како што сум информиран за дел од нив има одредени постапки и процедури пред институциите, изјави Мицкоски.
Граѓаните се веќе нетрперливи, тие сакаат сега кога е време на зимница да видат резултати од мерките на Владата, оти велат: дојде време ајвар и туршија да станат луксуз.
