Според најновите информации од Управата за хидрометеоролошки работи (УХМР), попладнево во неколку региони низ земјава се забележува нестабилна облачна маса проследена со невреме.
На северозападот и истокот од Скопје е забележан пороен дожд, придружен со грмежи и засилен ветер. Истовремено, североисточно од Пробиштип, во планинските предели, е регистрирана слаба нестабилност со локални врнежи од дожд и грмежи.
Од УХМР потсетуваат дека уште пред повеќе од еден час радарската слика покажала појава на нестабилно време во планинските предели североисточно од Охрид и Ресен, каде што имало пороен дожд, грмежи, засилен ветер и локално можност за појава на град. Слична облачна нестабилност е забележана и североисточно од Пробиштип.
Според најавите на УХМР, под влијание на влажна и нестабилна воздушна маса во понеделник на повеќе места ќе биде нестабилно со пороен дожд и грмежи. Локално процесите ќе бидат поинтензивни со услови за невреме, засилен ветер и изолирана појава на град. Во вторник ќе има услови за изолирана појава на нестабилност, а од среда ќе преовладува претежно стабилно време со постепен пораст на дневната температура.
