Православните христијани денеска, 21 ноември, го одбележуваат празникот Свети Архангел Михаил – Арангеловден, еден од најголемите и најпочитуваните празници во православната традиција, кој воедно е и една од најчестите семејни слави кај македонските верници.
Според христијанското учење, Архангел Михаил е водач на небесната војска и симбол на победата на доброто над злото. Тој е прикажан како небесен воин со меч, кој ги предводел ангелите што останале верни на Бога во борбата против паднатите ангели предводени од Луцифер.
Во православната традиција, Архангел Михаил се смета за заштитник на праведните, чувар на верата и застапник на луѓето пред Бога. Во народните верувања се споменува и како ангел кој ги придружува човечките души во нивниот последен пат.
На овој празник верниците се молат за здравје, мир, благосостојба и заштита на семејството. Според старите народни обичаи, Арангеловден е ден кога треба да се простат навредите, да се надминат несогласувањата и да се покаже милосрдие кон другите.
Именден денеска слават: Ангел, Ангеле, Ангелина, Михаил, Михаила, Михо, Мила, Милка, Рајко, Рајна и Ратка.
Со празникот се поврзани и бројни народни преданија. Едно од нив раскажува дека Архангел Михаил талка меѓу луѓето преправен во сиромав човек за да ги испита нивната добрина и човечност, наградувајќи ги оние што помагаат и покажуваат милост.
Во народната традиција постојат и приказни за чудотворни исцелувања што му се припишуваат на Архангел Михаил. Според едно предание, тој му се јавил на човек во сон и му открил како да ја излекува својата тешко болна ќерка. Во друго предание се раскажува за момче кое, по тешка повреда на главата, наводно било спасено по негово застапништво, а успешната операција се случила токму на денот на празникот.
Во минатото, во повеќе краишта на Македонија, Арангеловден се одбележувал со семејни собири, богати трпези и традиционални обичаи. Во некои места се принесувал курбан, додека во охридскиот регион постоел обичај на овој ден да се колат свињите што биле одгледувани за зимницата.
Според народните верувања, времето на Арангеловден ја претскажува зимата. Старите велеле дека какво ќе биде времето на денешниот ден, таква ќе биде и претстојната зимска сезона.
За православните верници, суштината на празникот е молитвата, благодарноста, простувањето и желбата за здравје, мир и благослов во домот.
