Четворица турски државјани со привремен престој во Штип заработија кривична пријава за „изнуда“ во обид и „предизвикување општа опасност“, информира Министерството за внатрешни работи.
Со пријавата се опфатени К.К. (22), Р.А. (24), Ф.С. (25) и Р.Б. (23), сите државјани на Турција.
Според полициските информации, прво- и второпријавениот К.К. и Р.А., кои во моментот се на издржување затворска казна во КПУ „Идризово“, преку третопријавениот Ф.С., во периодот од 9 до 17 ноември 2026 година, во повеќе наврати се обиделе да изнудат пари од Џ.О., исто така државјанин на Турција.
Како што наведува МВР, преку телефонски разговори и директни средби организирани преку Ф.С., тие му побарале најпрво 100.000 евра, при што му се заканувале и со неговото семејство.
Откако одбил да ја исплати сумата, барањето било намалено на 40.000 евра, но Џ.О. повторно одбил да плати.
Потоа, според пријавата, осомничените го поттикнале четвртопријавениот Р.Б. на 17 ноември 2026 година да го запали возилото на сопругата на Џ.О. Возилото било запалено на паркинг простор на улицата „Страшо Пинџур“ во Штип.
Надлежните институции продолжуваат со постапката за целосно расчистување на случајот и утврдување на сите околности.
