СДСМ обвини дека доцнењето со префрлањето на пензиските придонеси во вториот столб го доведува во прашање правото на граѓаните на сигурна пензиска заштита.
Од партијата соопштија дека заклучно со 31 октомври, вкупно 51 милион евра од придонесите на граѓаните не биле префрлени во вториот пензиски столб, иако, како што наведуваат, станува збор за средства што работниците секој месец ги издвојуваат од своите плати за идните пензии.
„Тоа се пари што работниците секој месец ги издвојуваат од своите плати за сигурна и достоинствена пензија. Власта на Мицкоски ги доведува во ризик пензиските заштеди на повеќе од 650.000 граѓани“, велат од СДСМ.
Опозициската партија тврди дека Фондот на ПИОМ има законска обврска придонесите за вториот пензиски столб да ги префрли во рок од пет дена, но дека во овој случај, според нив, рокот бил надминат за повеќе месеци.
Од СДСМ најавија дека за случајот треба да се утврди одговорност и посочија дека, според нив, таа треба да започне од директорот на Фондот на ПИОМ, Никола Мемов.
„Бараме парите веднаш да се префрлат, а Јавното обвинителство да постапи и да ја утврди одговорноста. Работниците ги заработиле тие пари. Власта е должна да ги префрли, а одговорните за доцнењето да одговараат“, наведуваат од СДСМ.
Од партијата не соопштија дополнителни детали за причините поради кои, според нивните тврдења, дошло до доцнење со трансферот на средствата.
