Пратеничката од ВМРО-ДПМНЕ, Драгана Бојковска, на денешната седница на Комисијата за финансирање и буџет, каде што се разгледува Предлог-буџетот за 2027 година, оцени дека вистинската вредност на буџетот не се гледа само во бројките, туку во резултатите што ќе произлезат од вложените средства.
Според Бојковска, буџетот претставува „економска, развојна и политичка порака“ за насоката во која треба да се движи државата, со фокус на економски раст, инвестиции и подобрување на јавните услуги.
Таа посочи дека со буџетските проекции за 2027 година се предвидува реален раст на БДП од 3,8 проценти и просечна инфлација од 3,2 проценти.
„Во првата половина од 2026 имаме економски раст од 3,7 проценти, а во вториот квартал раст од 4,3 проценти. Тоа е основа за оптимизам, дури и во услови на геополитички предизвици“, рече Бојковска.
Таа направи споредба со претходни периоди, посочувајќи дека, според неа, актуелните економски политики обезбедуваат поголема стабилност и помал притисок врз граѓаните.
„Во октомври 2026 година годишната инфлација во Македонија изнесува 3,3 проценти, наспроти 4 проценти во еврозоната. За потсетување, во октомври 2022 година, во периодот на владата предводена од СДС, инфлацијата во Македонија достигна 19,8 проценти“, изјави Бојковска.
Пратеничката посебно се осврна на средствата наменети за образованието, нагласувајќи дека нема силна економија без квалитетен образовен систем.
За Министерството за образование и наука со Предлог-буџетот за 2027 година се планирани 46,6 милијарди денари. Бојковска информираше дека се предвидени средства за изградба на 30 нови и реконструкција на 30 постојни училишни спортски сали, односно вкупно 60 современи спортски објекти за учениците низ државата.
За студентските домови, како што посочи, се планирани 431,5 милиони денари за енергетска рехабилитација, а ќе продолжи и реконструкцијата на седум студентски домови во Скопје, Битола, Прилеп, Штип и Охрид, како и на шест ученички домови.
Бојковска нагласи дека за студентски стандард се предвидени 1,9 милијарди денари, што претставува зголемување од 7,2 проценти. Средствата, според неа, ќе бидат насочени кон повеќе стипендии и поголема поддршка за студентите.
„Со новиот модел на студентско стипендирање предвидени се 3.000 студентски стипендии, од кои 1.050 стратешки стипендии во износ од 18.000 денари месечно. Дополнително, предвидени се и стипендии за социјална поддршка, како и за висок академски успех“, рече Бојковска.
Таа додаде дека за ученички стандард се предвидени 696 милиони денари, што според неа претставува раст од 12,3 проценти.
