Младиот офанзивец на Црвена звезда, Матеј Гаштаров, е едно од новите имиња во македонската фудбалска репрезентација за натпреварите од Лигата на нации. Пред гостувањето кај Шкотска, талентираниот фудбалер порача дека настапот за националниот тим сам по себе е најголемата мотивација.
Гаштаров истакна дека Македонија ја очекува тежок предизвик против силен противник, но верува дека репрезентацијата има квалитет да одигра добар натпревар.
„Кога го носиме дресот на Македонија, мислам дека не треба да бараме посебна мотивација, затоа што самото тоа што сме во А-тимот е доволно. Играме против голема Шкотска, имаат квалитетни играчи, но и ние имаме свои адути кои се во врвна форма. Ќе излеземе на теренот да дадеме сè од себе, да оставиме срце на терен и да уживаме во фудбалот“, изјави Гаштаров.
Младиот репрезентативец откри дека во краток период неговата кариера доживеала голем пресврт, но нагласи дека не чувствува притисок и сака да го искористи секој момент на најдобар можен начин.
„За мене во дваесет дена се смени целиот живот и ова е нешто ново. Гледам кога ќе излезам на теренот да уживам. Играв против многу големи играчи и големи репрезентации, немам притисок и гледам едноставно да го доживувам секој момент“, додаде тој.
Натпреварот меѓу Шкотска и Македонија ќе се одигра утревечер на стадионот „Хемпден Парк“ во Глазгов, со почеток во 20:45 часот по македонско време.
Правдата на овој натпревар ќе ја дели словачкиот судија Михал Оченаш.
