Полска денеска ја одбележува 108-годишнината од обновувањето на својата независност со низа државни свечености, воена парада, културни и спортски настани, како и со традиционалниот Марш на независноста во Варшава, за кој организаторите очекуваат до 500.000 учесници.
Централната државна церемонија се одржува на Плоштадот Пилсудски пред Гробот на непознатиот војник, каде што е организирана свечена смена на стражата во присуство на полскиот претседател, по што следува и воена парада.
Полска ја обнови својата независност на 11 ноември 1918 година, по 123 години поделба меѓу Руската Империја, Прусија и Австро-Унгарија. Неколку дена подоцна, на 16 ноември, тогашниот лидер Јозеф Пилсудски испратил телеграма до светските сили со која официјално го известил светот за создавањето на независната полска држава.
Во Варшава денеска повторно ќе се одржи и Маршот на независноста, кој од 2010 година стана традиционален настан. Организатор е здружението „Марш на независноста“, кое се залага за зачувување на полскиот национален идентитет, суверенитетот и христијанските вредности.
Маршот се смета за една од најголемите патриотски и националистички манифестации во Европа, а секоја година привлекува десетици илјади учесници, вклучително и националистички движења од други европски земји.
Рекордната посетеност беше забележана во 2018 година, кога по повод стогодишнината од независноста државната прослава и Маршот на независноста беа обединети, а на улиците на Варшава излегоа повеќе од 250.000 луѓе.
Годинашниот марш се одржува под мотото „Полјакот е домаќин на сопствената земја!“, а своето присуство го најави и претседателот Карол Навроцки, заедно со претставници на националистички и конзервативни организации.
Иако во минатото маршевите знаеја да бидат проследени со инциденти, последните години тие поминуваат без поголеми нарушувања на јавниот ред и мир.
