Пратеникот на Левица, Амар Мециновиќ, на собраниската расправа за вториот ребаланс на Буџетот за 2026 година упати остри критики до Владата, обвинувајќи ја дека со јавните финансии управува како со партиска сопственост и ги игнорира предлозите на опозицијата.
Според Мециновиќ, владејачкото мнозинство не прифатило ниту еден од вкупно 124-те амандмани поднесени од опозициските пратеници, што, како што рече, покажува дека политичките интереси имаат предност пред јавниот интерес.
„ВМРО-ДПМНЕ има парламентарно мнозинство, но нема монопол врз јавниот интерес. Буџетот на Република Македонија не е партиска сопственост“, изјави Мециновиќ.
Тој посочи дека меѓу одбиените предлози се амандмани поврзани со следење на загадувањето, подобрување на социјалната заштита, развој на инфраструктурата, набавка на нови автобуси за Скопје, како и решавање на прашањата поврзани со рудниците во југоисточниот регион и проектите „Чебрен“ и „Галиште“.
Мециновиќ оцени дека фактот што Владата предлага втор ребаланс на Буџетот само два месеци по претходниот е показател за лошо буџетско планирање.
Од Левица порачаа дека ваквиот пристап ја исклучува опозицијата од процесот на одлучување за јавните финансии и најавија дека нема да го поддржат, барајќи суштинска расправа за Буџетот за 2027 година.
