Камениот мост, едно од најпрепознатливите обележја на Скопје, доби ново декоративно и архитектонско осветлување, кое вечерва свечено беше пуштено во употреба.
На свеченоста присуствуваа градоначалникот на Скопје, Орце Ѓорѓиевски, градоначалникот на турската општина Есенлер, Мехмет Тевфик Гоксу, амбасадорот на Турција во Македонија, Алпер Акташ, извршниот директор на „Халк банка“, Фатих Шахбаз, како и почесниот конзул Ајдован Адемоски.
Со новото осветлување дополнително се нагласуваат архитектонските вредности и историското значење на Камениот мост, кој со векови ги поврзува двата брега на реката Вардар и претставува еден од најзначајните симболи на главниот град.
Според градоначалникот Ѓорѓиевски, проектот е реализиран во рамки на Протоколот за пријателство и соработка меѓу Град Скопје и турската општина Есенлер.
Тој изрази благодарност до градоначалникот Гоксу, Општина Есенлер, „Халк банка“, извршниот директор Фатих Шахбаз и почесниот конзул Ајдован Адемоски за поддршката и придонесот во реализацијата на проектот.
Ѓорѓиевски нагласи дека Камениот мост е дел од заедничкото историско наследство на Скопје и дека неговото зачувување и унапредување претставува обврска кон идните генерации.
