Министерот за надворешни работи и надворешна трговија, Тимчо Муцунски, денеска оствари средба со вршителот на должноста амбасадор на Соединетите Американски Држави, Никол Варнс, на која во фокусот биле билатералните односи и можностите за дополнително продлабочување на соработката меѓу двете земји.
Како што информира Муцунски преку објава на социјалните мрежи, соговорниците ја разгледале динамиката на спроведување на активностите предвидени во рамките на Стратешкиот дијалог меѓу Македонија и САД.
Посебно внимание било посветено на економската соработка, трговската размена и можностите за отворање нови иницијативи со кои дополнително би се зајакнало партнерството меѓу двете држави.
На средбата биле разгледани и оценките за надворешната политика на Македонија содржани во последниот Извештај на Европската комисија.
Муцунски истакнал дека земјава останува целосно усогласена со Заедничката надворешна и безбедносна политика на Европската Унија, нагласувајќи дека стратешките приоритети во надворешната политика се темелат на силното партнерство со САД и сојузништвото во НАТО.
