Авионот на компанијата „Ер Србија“ кој вечерва летал од Белград кон Москва бил вратен на аеродромот „Никола Тесла“ поради, како што неофицијално се наведува, безбедносни причини.
Според информациите на српскиот портал „Нова“, летот JU134 полетал од Белград во 18:48 часот, но за време на патувањето, кога леталото се наоѓало над подрачје во близина на јужна Литванија, добило наредба да се врати назад.
Неофицијалните информации наведуваат дека одлуката за враќање на авионот била донесена поради проценети безбедносни ризици, но засега нема официјална потврда од надлежните институции или од авиокомпанијата за точната причина.
Според истиот извор, меѓу патниците на летот биле и претседателот на „Движењето на социјалистите“ Александар Вулин, директорот на „Србијагас“ Душан Бајатовиќ и претседателот на „Српската народна партија“ Ненад Поповиќ.
Новинарите се обиделе да добијат изјава од Вулин и Бајатовиќ, но тие не биле достапни за коментар.
Засега останува нејасно дали станувало збор за конкретна безбедносна закана, техничка проценка или друга причина поради која леталото било вратено во Белград.
