Полициски службеници од СВР Штип утрово спроведуваат претреси на повеќе локации во Штип и Скопје во рамки на истрага за сомнителни постапки поврзани со испити и административни процеси на Универзитетот „Гоце Делчев“ во Штип.
Според неофицијални информации, истрагата се однесува на лице кое било вработено на Универзитетот на раководна позиција во ИТ секторот. Постои сомнение дека во подолг период можело да има неовластени интервенции во електронските системи, поврзани со внесување бодови од испити, запишување семестри без исполнети услови и бришење оценки.
Според првичните информации, за ваквите интервенции осомничениот наводно добивал паричен надомест, а услугите главно им биле нудени на странски студенти, меѓу кои и студенти од Турција кои во поголем број се школуваат на овој универзитет.
Неофицијално, при претресите била пронајдена поголема сума пари во домот на осомниченото лице.
Од Министерството за внатрешни работи засега нема официјална потврда за случајот, ниту детали за текот на истрагата.
