Со затворањето на избирачките места во 20 часот заврши гласањето на предвремените парламентарни избори во Србија, кои минаа во атмосфера на високи политички тензии, засилени безбедносни мерки и голема излезност. Првите проценки за резултатите се очекуваат во текот на вечерта, кога ќе стане појасно кој ќе ја има предноста во трката за новиот парламентарен состав.
Во Белград вечерва е засилено присуството на полициски сили, а на повеќе локации се распоредени дополнителни полициски службеници и службени возила. Дел од угостителските објекти и локали ги заштитија своите излози со дрвени плочи, поради страв од можни инциденти по објавувањето на резултатите.
Дополнителни тензии предизвика повторното поставување шатори во Пионерскиот парк, познат како „Ќациленд“, кој и натаму е обезбеден со метални бариери. Според српските медиуми, на локацијата биле забележани камиони со опрема и полициски екипи.
Студентското движење, кое на овие избори настапува со сопствена изборна листа, непосредно пред затворањето на гласачките места порача дека очекува позитивен изборен резултат и оцени дека „победата никогаш не била поблиску“.
Во меѓувреме, Вишото јавно обвинителство во Белград соопшти дека ќе реагира на секој обид за нарушување на јавниот ред и мир, повикувајќи ги сите учесници во изборниот процес да се воздржат од насилство и од предвремено прогласување изборни резултати.
Изборниот ден беше обележан и со повеќе пријави за неправилности и инциденти низ Србија. Дел од медиумите известуваа за физички пресметки, напади, употреба на експлозивни направи и повредени лица, додека институциите најавија дека ќе ги испитаат сите пријавени случаи.
