СДСМ обвини дека граѓаните се соочуваат со сè поголем притисок врз домашните буџети поради растот на трошоците за живот, оценувајќи дека секој месец носи нови поскапувања.
Од опозициската партија посочуваат дека од почетокот на годинава трошоците за живот се зголемиле за околу 4.000 денари, додека синдикалната минимална кошничка во октомври надминала 70.000 денари. Со пресметана кирија за стан, според нив, месечните потреби на едно семејство се приближуваат до 90.000 денари.
Според СДСМ, голем број работници не можат да ги покријат основните трошоци, бидејќи околу 180.000 лица примаат плата пониска од 31.200 денари, а минималната плата изнесува околу 26.000 денари.
„Работникот работи цел месец, а платата не му стигнува за живот. Реалноста зад ветувањата е животен стандард на една третина од европскиот. Власта ги одби мерките на СДСМ за заштита на стандардот на почетокот на кризата, одби минимална плата од 600 евра и поддршка за земјоделците“, наведуваат од партијата.
Опозицијата предупредува и на нови зголемувања на трошоците од јануари, особено кај сметките за електрична енергија и парно греење. Од СДСМ велат дека граѓаните се оставени сами да се справуваат со дополнителниот финансиски товар.
Воедно, партијата го критикува и новиот ребаланс на буџетот, оценувајќи дека не содржи доволно мерки за заштита на животниот стандард, туку отвора простор за ново задолжување. Од СДСМ тврдат дека јавниот долг во изминатите две години е зголемен за четири милијарди евра.
