Уште пред отворањето на избирачките места утринава, низ Србија се формираа долги редици граѓани кои чекаа да го остварат своето право на глас на предвремените парламентарни избори, кои се сметаат за едни од најзначајните во последните години.
Од повеќе градови пристигнуваат снимки на кои се гледаат колони од гласачи долги стотици метри уште пред 7 часот, кога официјално започна гласањето.
Голем одѕив е забележан и во дипломатско-конзуларните претставништва на Србија во странство. Според објавените снимки, пред Конзулатот на Србија во Њујорк уште околу еден часот по полноќ по локално време имало стотици граѓани кои чекале да се отвори избирачкото место. Гласањето во странство се организира според времето во Србија.
Студентското движење, кое е еден од главните политички фактори на овие избори, ги повика граѓаните да гласаат веднаш по отворањето на избирачките места, со цел, како што наведоа, да се намали можноста за евентуални притисоци и инциденти во текот на денот. И на претходните избори беше вообичаено поддржувачите на Српската напредна партија да гласаат во раните утрински часови.
Предвремените парламентарни избори се оценуваат како најголемиот политички тест за владеењето на претседателот Александар Вучиќ во изминатите 14 години. Неговиот политички блок се соочува со силен предизвик од студентското движење, кое доби широка поддршка по трагедијата со уривањето на настрешницата на железничката станица во Нови Сад во ноември 2024 година, кога загинаа 16 лица.
За 250 пратенички места во Народното собрание се натпреваруваат 18 изборни листи, од кои девет се листи на националните малцинства. Право на глас имаат повеќе од 6,45 милиони граѓани, а за влез во парламентот е потребно да се освои најмалку три проценти од гласовите, правило што не важи за малцинските листи.
Гласачките места се отворени од 7 до 20 часот, по што ќе започне пребројувањето на гласовите.
