По утринската магла во дел од котлините, денеска низ Македонија ќе преовладува променливо облачно време со сончеви периоди и слаб до умерен ветер од јужен правец, информира Управата за хидрометеоролошки работи (УХМР).
Според прогнозата, утринските температури ќе се движат од 3 до 11 степени, додека дневните ќе достигнат меѓу 18 и 22 степени.
Во Скопје се очекува променливо облачно време со сончеви периоди и слаб до умерен ветер од променлив правец. Минималната температура ќе биде околу 6 степени, а максималната ќе достигне до 20 степени.
Од УХМР најавуваат промена на временските услови во недела, кога ќе преовладува променливо облачно време со повремени локални врнежи од дожд.
Од почетокот на новата работна седмица повторно се очекува стабилизирање на времето. Од понеделник ќе има мала облачност и повеќе сончеви периоди, а ќе дува северозападен ветер, кој во понеделник и вторник долж Повардарието повремено ќе биде засилен.
