ВМРО-ДПМНЕ со реакција одговори на денешната прес-конференција на портпаролката на СДСМ, Богданка Кузеска, оценувајќи дека нејзините изјави претставуваат признание за работата на актуелната Влада.
Од владејачката партија посочуваат дека Кузеска укажала на тоа оти претседателката на Европската комисија, Урсула фон дер Лајен, ги употребува термините македонски јазик, македонска култура и македонски идентитет, што, според ВМРО-ДПМНЕ, претставува потврда за променетата позиција на земјата.
Во реакцијата се наведува дека ваквиот став доаѓа од партија која, според ВМРО-ДПМНЕ, за време на своето владеење инсистирала на употребата на придавката „Северна“ и спроведувала политики кои, како што тврдат, биле на штета на националните интереси.
Од владејачката партија оценуваат дека денес европските претставници отворено зборуваат за македонскиот јазик, култура и идентитет, што, според нив, претставува зајакнување на македонската позиција во европските институции.
Реакцијата следува откако портпаролката и членка на Извршниот одбор на СДСМ, Богданка Кузеска, изјави дека пораките на Урсула фон дер Лајен за признавањето на македонскиот идентитет во Европската Унија ја потврдуваат политиката што, според СДСМ, партијата и нејзиниот претседател Венко Филипче ја застапувале во изминатиот период.
