Кошаркарскиот клуб Куманово пред стартот на новата сезона во македонската Супер-лига обезбеди значајно засилување. Нов член на тимот е македонскиот репрезентативец Адем Мекиќ, кој ќе претставува големо засилување за составот предводен од искусниот тренер Марин Докузовски.
Мекиќ со раководството на Куманово договорил посебни услови, а во договорот има вградена клаузула според која може да го напушти клубот само доколку добие понуда од странски тим.
За репрезентативецот ова ќе биде враќање во добро позната средина. Мекиќ повторно ќе го облече дресот на Куманово по пауза од неколку години, откако претходно настапуваше за овој клуб во периодот од 2017 до 2019 година.
Куманово новата сезона ќе ја отвори со гостување кај МЗТ Скопје. Двата тима веќе се сретнаа во Суперкупот на Македонија, каде актуелниот шампион излезе како победник.
