Фудбалската репрезентација на Македонија остана без бодови по првите две кола во Лигата на нации, откако загуби со 2:0 на гостувањето против Словенија. По поразот од Швајцарија во првото коло, националниот тим повторно не успеа да постигне гол, па негативната серија во нападот продолжува.
Македонија на овој натпревар настапи со значително изменет состав, откако селекторот Гоце Седлоски направи осум промени во стартната постава. И покрај тоа, во првото полувреме репрезентацијата покажа добра организација и успеа да се спротивстави на фаворизираниот домаќин.
Словенија подобро го започна натпреварот и уште во раната фаза ја погоди гредата преку Жан Випотник. Македонија брзо одговори, а најдобрата шанса ја имаше Агон Елези, кој беше блокиран во последен момент при обидот од непосредна близина.
Во продолжението домаќинот имаше поголем посед и неколку опасни ситуации, но Столе Димитриевски одлично реагираше при ударите на словенечките фудбалери. Македонија, пак, се закани преку Елези, кој шутираше од далечина, но без успех.
На пауза се замина без голови, но Словенија во второто полувреме продолжи со притисокот. По неколку пропуштени можности, домашната селекција поведе во 55. минута. Санди Ловриќ упати силен удар од коса позиција, а топката по интервенцијата на Мељими доби изменет правец и заврши зад грбот на Димитриевски.
По примениот гол, Македонија се обиде да го промени текот на натпреварот. Во игра влегоа Енис Барди, Христијан Малески, Лука Станковски и Бојан Миовски, а македонската селекција започна поофанзивно.
Најдобрата можност за израмнување ја имаше во 78. минута, но по добрата акција на Станковски, во завршницата немаше македонски фудбалер кој би упатил удар кон голот.
Словенија ја искористи својата следна шанса и во 82. минута постигна втор гол преку Аљоша Матко, кој излезе сам пред Димитриевски и рутински ја затресе мрежата.
До крајот Македонија не успеа да го намали резултатот. Христијан Малески имаше добра можност, но Јан Облак со одлична интервенција го спречи првиот македонски гол во натпреварот.
По два одиграни натпревари во Лигата на нации, Македонија останува без освоен бод и без постигнат погодок, со продолжена голгетерска криза која трае повеќе од 10 часа.
