Инспекциските служби на Агенцијата за храна и ветеринарство (АХВ), во координација со надлежните институции, спроведоа вонредна контрола на дивите продавачи на земјоделски производи поставени долж булеварот „Крсте Петков Мисирков“ во Скопје.
Акцијата била реализирана во раните утрински часови на потегот од трговскиот центар „Мавровка“ до Бит-пазар, а во неа учествувале и комуналните инспектори на Град Скопје, инспектори од Државниот пазарен инспекторат и припадници на Министерството за внатрешни работи.
Од АХВ информираат дека биле отстранети сите диво поставени тезги, од кои најголем дел биле наменети за продажба на овошје и зеленчук. При контролата биле одземени околу 500 килограми храна, претежно земјоделски производи, како и целата опрема за продажба поставена на пешачките и велосипедските патеки.
„Отстранети се сите диви тезги, повеќето со овошје и зеленчук. Одземена е храна во количина од околу 500 килограми и отстранета е целокупната опрема за продажба што била диво поставена на пешачките и велосипедските патеки. На сторителите ќе им бидат изречени соодветни прекршочни мерки“, соопштија од АХВ.
Од Агенцијата дополнително информираат дека во одделна акција со СВР Гостивар, официјални ветеринари извршиле контрола на приватен имот во селото Чајле, каде што биле пронајдени 150 килограми месо со изминат рок, без декларација и со непознато потекло.
Небезбедното месо било запленето и уништено на депонијата „Русино“.
