Досегашните билатерални средби меѓу Македонија и Бугарија не донеле суштински резултат, а во идните разговори треба да биде вклучена и Европската Унија, изјави премиерот Христијан Мицкоски во интервју за МТВ. Тој ги опиша досегашните контакти како средби „колку да се случат“ и оцени дека по нив двете страни често излегуваат со различни толкувања за она што било разговарано.
Според Мицкоски, токму затоа присуството на претставници на ЕУ би овозможило европските партнери директно да ги слушнат аргументите и на Скопје и на Софија. Тој смета дека меѓу двете земји фактички постои билатерален спор и дека неговото решавање треба да се бара преку дијалог додека процесот е сè уште во почетна фаза. Премиерот оцени дека Софија е резервирана кон присуството на трета страна бидејќи тоа, според него, би значело признавање дека навистина станува збор за билатерален спор.
„Нашата идеја кога велиме да се вклучи и Европската Унија е со цел да ги слушнат и нашите аргументи и аргументите на другата страна. Јас знам која е загриженоста од страна на официјална Софија. Тие велат: ‘ако ние седнеме во присуство на трет партнер, тоа значи дека навистина имаме билатерален спор’. И навистина ние имаме билатерален спор. Ние можеме да измислуваме, да се правиме дека немаме, ние во суштина навистина имаме билатерален спор којшто е сега на својот почеток. И додека е на почеток, јас тоа го кажав и во мојот говор вчера, ние треба да водиме дијалог и токму поради тоа ни се потребни претставници на мултилатерални организации, во случајов Европската Унија, за да ги слушнат аргументите“, изјави Мицкоски.
Премиерот нагласи и дека Владата не сака да влезе во процес на евроинтеграции во кој однапред нема јасна перспектива за неговиот крај. Според него, отворањето на преговорите само по себе не е доволна гаранција бидејќи во текот на процесот постојат повеќе моменти кога одлуките зависат од земјите членки на ЕУ. Тој стравува дека тоа би можело да отвори простор за нови барања и блокади од Бугарија во различни фази од преговорите.
Мицкоски порача дека нема да прифати процес во кој условите постојано би се менувале и би се појавувале дополнителни барања. Во своето обраќање пред Генералното собрание на ОН тој претходно оцени дека македонскиот евроинтегративен процес трае „надвор од секој разумен временски рок“ и побара од ЕУ поголема предвидливост и почитување на правилата.
Владата, според премиерот, има свои предлози за надминување на спорот и смета дека решение треба да се бара заеднички со Бугарија. Како аргумент ја посочи и соработката во НАТО, каде што двете држави се сојузници, оценувајќи дека партнерски однос треба да постои и во процесот на европска интеграција.
Мицкоски смета дека членството на Македонија во ЕУ треба да биде и во интерес на официјална Софија доколку двете земји сакаат да градат добрососедски односи. Бугарското МНР претходно соопшти дека пристапувањето на Македонија е европско прашање кое треба да се разгледува во рамките на европските институции, но истовремено останува на ставот дека земјата треба да ги исполни преземените обврски.
Премиерот нагласи дека Владата ја користи секоја средба со меѓународните партнери за да ги претстави македонските позиции и аргументи за евроинтегративниот процес. Тој посочи дека тоа се прави и во разговорите со стратешките партнери, меѓу кои и Соединетите Американски Држави.
Според Мицкоски, целта е соговорниците директно да бидат запознаени со позициите на Владата, а потоа самите да проценат дали македонските аргументи се оправдани.
