Претседателот на СДСМ, Венко Филипче, од Струга упати критики кон владината посета на Соединетите Американски Држави, оценувајќи дека јавноста има право да знае колку чини патувањето и кој ги покрива трошоците за делегацијата.
Тој изјави дека, според информациите со кои располага партијата, делегацијата брои повеќе од 50 лица и побара поголема транспарентност околу организацијата и финансирањето на посетата.
Филипче посочи и дека, според објавениот список на државници и функционери кои треба да остварат средба со американскиот претседател Доналд Трамп, на него не се наоѓа името на премиерот Христијан Мицкоски.
Според лидерот на СДСМ, американската администрација е запознаена со политиките што ги спроведува актуелната Влада. Тој обвини дека власта носи политики кои, според него, не се усогласени со интересите на стратешките партнери на државата – САД и Европската Унија.
Филипче, исто така, оцени дека Владата ја нарушува демократијата и врши притисок врз медиумите, додавајќи дека таквиот пристап негативно се одразува врз односите со меѓународните партнери.
Како еден од показателите за тоа, тој наведе дека, според неговите тврдења, за првпат од осамостојувањето на државата, Соединетите Американски Држави ја намалиле воената помош за Македонија.
