Вардар ја продолжи победничката серија во Првата македонска фудбалска лига откако вечерва на домашен терен ја совлада Шкендија Арачиново со 2:0 во натпревар од 8. коло.
„Црвено-црните“ до триумфот стигнаа во второто полувреме, кога беа постигнати двата гола. Бобан Николов во 46. минута го отвори резултатот, а Горан Закариќ во 69. минута го потврди успехот на домаќините со втор погодок.
Со новите три бода Вардар се искачи на третата позиција на табелата со 14 освоени бодови, исто колку што има и Струга, но со еден натпревар повеќе.
Во останатите дуели од колото одиграни вчера, Шкендија беше убедлива против Башкими со 4:1, додека Силекс и Тиквеш одиграа без голови, 0:0.
Колото ќе продолжи на 21 септември со натпреварот Струга – Аресими, а ќе биде комплетирано на 23 септември со средбата Брегалница – Скопје.
На врвот на табелата останува Шкендија со 19 бодови од осум натпревари, пред Струга и Вардар со по 14 бодови. Тиквеш има 13, Шкендија Арачиново 13, Силекс 9, Аресими 8, Брегалница 7, Башкими 4 и Скопје 3 бода.
