Во Основниот кривичен суд во Скопје денеска продолжува судењето за случајот „Државна лотарија“, во кој меѓу обвинетите се поранешниот вицепремиер Артан Груби и поранешниот директор на Државна лотарија, Перпарим Бајрами.
Бајрами минатата недела се предаде на граничниот премин „Блаце“, откако претходно за него беше распишана меѓународна потерница. По предавањето бил спроведен во затворот во Скопје, каде ја издржува претходно определената мерка притвор.
Во предметот се обвинети вкупно осум лица – Бајрами, Груби, Методија Димевски, Скендер Мехмети, Бојан Јанев, Фатмир Рамадановски, Александар Димитриоски и Башким Авдиу. На првото рочиште повеќето обвинети се изјасниле дека не се чувствуваат виновни, додека Авдиу побара обвинението да му биде доставено писмено на албански јазик.
Според обвинението, дејствата за кои се товарат обвинетите се однесуваат на периодот 2023–2024 година и наводно претставуваат пречекорување на службените овластувања, со што на „Државна лотарија“ ѝ била предизвикана штета од 596.125.511 денари.
