Македонскиот ракометен шампион Вардар со пораз ја отвори домашната сезона во Лигата на шампионите, откако во драматичен натпревар во СЦ „Јане Сандански“ загуби од францускиот Нант со 32-33.
Дуелот понуди голема неизвесност и постојани резултатски пресврти. И двата тима имаа свои периоди на доминација, а победникот беше решен буквално во последните секунди од средбата.
Во завршната минута резултатот беше израмнет на 32-32. Вардар имаше напад за водство, но Јака Малус не успеа да ја затресе противничката мрежа. На спротивната страна, Нант доби седмерец и преку сигурна реализација стигна до победничките 33-32.
Со овој пораз, Вардар ја продолжи долгата серија без триумф во елитното европско натпреварување. Последната победа во Лигата на шампионите ја оствари во март 2022 година, кога убедливо го совлада Елверум со 39-30.
И покрај разочарувањето, навивачите во „Јане Сандански“ ги испратија ракометарите со аплауз и песна, давајќи им поддршка по борбеното издание.
Најефикасни во составот на Вардар беа Абделхак со 10 погодоци и Јака Малус со шест. Кај Нант блескаше Леополд, кој натпреварот го заврши со 13 постигнати голови.
